इंदापूर शहर प्रतिनिधी– मयुरा पाटील

उजनी धरणात बोट उलटून चार जण बेपत्ता असल्याची भीती वर्तवण्यात येत आहे. सध्या वातावरणातील बदलामुळे निर्माण झालेल्या सोसाट्याच्या वा-याने ही बोट उलटली असल्याची प्राथमिक माहिती मिळत असून या घटनेत काहीजण बुडाले असल्याची भीती व्यक्त केली जात आहे.

दरम्यान, याबाबत मिळालेल्या प्राथमिक माहितीनुसार, चार जण बेपत्ता असल्याचे बोलले जात आहे. याबाबत अधिक माहिती अशी की, इंदापूर तालुक्यातील कळाशी गावच्या हद्दीतून सोलापूर जिल्ह्यातील कुगाव येथे जाण्यासाठी उजनी पात्रात लॉन्चद्वारे वाहतूक केली जाते.

आज (मंगळवार) सायंकाळी कळाशी येथून नागरिकांना घेऊन एक लॉन्च निघाली होती. मात्र, अचानक सुटलेल्या वादळाने नियंत्रण राखता न आल्याने लॉन्च बुडाल्याचे समजत आहे. दरम्यान, स्थानिक ग्रामस्थ, महसूल विभागाचे व पोलीस दलाचे कर्मचारी त्या ठिकाणी पोहोचत आहेत, अशीही माहिती आहे